|
|
| مقالې/ |
امريكايي اجيرانو د پاكستان له قوانينو څخه سرغړونه وكړه
/18.3.2010
ولاديمير سكوسيرېف – د (( نېزاويسيمايا ګزيته )) خبريال.
كېداى شي چې د ليكوال ليد د (( افغانستان . رو )) له دريځ سره سمون ونه لري .
له ماسكوه خپرېدونكې (( نېزاويسيمايا ګزېته )) په خپله وروستۍ ګڼه كې ليكي : د امريكا د متحده ايالاتو د بهرنۍ څارګرۍ په كړيو كې لانجه رامنځته شوه . مالومه شوه چې په افغانستان او پاكستان كې د څار لپاره له ځاني شركتونو نه كار اخيستل كېده . د دغو عملياتو ، چې د اسلام اباد له لوري منع شوي ، مشري د پنتاګون يوه كاركوونكي كوله . په دغه كاركوونكي باندې د سركاري پيسو د لګولو شك كيږي .
ددغې كيسې تر ټولو لوى اتل د دفاع وزارت ملكي مامور (( مايكل فېرلن )) دى چې پخوا د متحده ايالاتو د پوځي هوايي ځواكونو افسر وو . ده په افغانستان او پاكستان كې داسې يوه څانګه په ټېكه جوړه كړې چې له سي . اى . اې او دفاع وزارت سره يې د جګړه مارو په څار او وژلو كې مرسته كوله . په دغه څانګه كې يې د سي . اى . اې او ځانګړو دندو پوځي ټولګيو پخواني كاركوونكي په كار ګومارل .
دغو اوپراتيفي كاركوونكو د جګړه مارو كمپونو د مېشتځاىونو په اړه مالومات راټولول او د امريكا څارګريزو خدماتو ته يې وركول . د بهرنيانو دا ډول كار او فعاليت پاكستان بند كړى دى ، خو واشنګټن ونه غوښتل چې دغه بنديز په پام كې ونيسي . دا چې دغې شبكې خپل كار په څومره اغېزمنتوب سره ترسره كاوه په اړه يې قضاوت كول ستونزمن دي . ددغې شبكې په اړه مالومات د (( نيويارك ټايمز )) ورځپاڼې او د امريكا متحده ايالاتو ادارې مامورينو د داسې شرايطو په پام كې نيولو سره راسپړلي چې نوم يا نومونه به يې نه ډاګيزه كيږي . داسې ښكاري چې د (( فېرلن )) كار له دغو مامورينو څخه د كوم چا نه دى خوښ شوى . دغه مامور وويل چې دده خلك د جګړه ييزو پېښو د سيمې پر شاخوا كې له يوه ځايه بل ځاى ته لېږدېدل ، خپل ځانونه يې د (( جېمز بونډانو )) په توګه ښودل .
په افغانستان كې له رسنيو سره د اړېكو په برخه كې د امريكا متحده ايالاتو لوى استازي د دريابي پوځونو جنرال (( ګرېګوري سميت )) هم د پنتاګون له خوا د جوړو شويو جوړښتونو په اړه ډېر منفي غبرګون ښودلى دى . (( فېرلن )) او د هغه امريكايي انډېوالانو بل چاته نه ، بلكې په خپله په افغانستان كې د امريكايي پوځيانو بولندوى جنرال (( دېويد ماكېرنان )) ته خپل وړانديز كړى چې د امريكا متحده ايالاتو اردو او ځاني كمپنيو لپاره دې اطلاعاتي شبكه جوړه شي . ددغې شبكې مالوماتو بايد امريكايي دولتي جوړښتونو او سوداګرۍ ته دا شونتيا وركړې واى چې د سيمې په ستونزو ښه پوه شي .
همدا ډول يوه شبكه ، چې ځايي وګړي يې اجيرول ، په عراق كې هم جوړه شوې وه . خو دغې شبكې دومره ډېر عايد نه درلود ، ځكه خو د سي . اى . اې او پوځ پخواني نوښتګر كاركوونكي د پيسو په خاطر پوځي قوماندانۍ ته پام واړاوه . د دريابي پوځونو جنرال ، چې تړاويز ( مواصلاتي ) خدمتونه يې تر لاس لاندې دي او دا دنده وركړ شوې وه چې د (( فېرلن )) او د هغه د انډيوالانو د نوښت ارزونه وكړي ، د دوى په وړانديز نيوكه وكړه . په ده دا خبره ښه ونه لګېده چې پوځيان دې په څارګريزو عملياتو بوخت شي . جنرال هممهال په دې اعتراف وكړ چې د امريكا متحده ايالات د رسنيو په برخه كې د مالوماتو راټولولو لپاره د نورو نهو ( ۹ ) نړيوالو كمپينو له خدمتونو نه كار اخلي .
(( فېرلن )) او دده همكاران د جنرال په برخه كې پروسږ كال له ناكامۍ سره مخ شول . خو له دې نه مخكې د حكومت له خوا ده ته نږدې دوه ويشت ( ۲۲ ) ميليونه ډالره بېل شوي ول . دا لږ پيسې نه دي . دا چې دا پيسې يې په څه شي لګښت كړې كره مالومه نه ده . لكه څنګه چې د دريابي پوځونو جنرال (( سميت )) ويلي ، (( فېرلن )) تر اوسه پورې د ۱۵ ميليونو حساب نه دى وركړى . اوسمهال پخوانى پيلوټ له كار نه ګوښه كړ شوى دى . دده پر وړاندې د پلټنې كار روان دى .
موږ د بهرنۍ څارګرۍ د لويې ادارې پخواني ډګروال (( ويتالي شليكوف )) ته پاملرنه وكړه او هيله مو ورنه وكړه چې د امريكايي ورځپاڼې په اړه خپله تبصره وكړي . ده وويل ، امريكايان په هر څه كې ګټه لټوي . دا چې ځاني بانكونه او كارپورېشنونه په نورو برخو كې ، نورو شركتونو ته ، د خپلې سوداګرۍ يوه برخه د (( اوت سورسينګ )) لپاره وركوي ، نو ولې پنتاګون او څارګريزې ادارې دا كار ونه كړي .
داسې رسمي ادارې لكه د ساري په توګه د امريكا متحده ايالاتو پوځي څارګري د خپلو سختو او جدي قاعدو له مخې كار كوي . هلته بايد خپلې مشرۍ ته د هر ګام په اړه په جدي ډول رپوټ وركړ شي . د (( ناپوځي كسانو )) لاسونه ډېر خپلواك دي او كولاى شي چې په زړورتيا سره خپل نوښت څرګند كړي .
كارپوه په پاى كې وويل ، ددغه دولت پوځيان هم نه تمامېدونكي نه دي . اوسمهال ۲۰۰ دوه سوه زره ځاني شركتونه د پنتاګون لپاره كار كوي . نور دولتي ارګانونه هم په همدې ډول كار بوخت دي . د ساري په توګه نږدې د ټولو مهمو اشخاصو ، له ولسمشر نه پرته ، ساتنه داسې خلك كوي چې د ځاني شركتونو له خوا په كار ګومارل شوي دي .
(( نېزاويسيمايا ګزيته ))
|
|
|
|
|
