|
|
| خبرونه/ |
امريكايي ودانيز تخنيك به د روسيې او منځنۍ اسيا له لارې افغانستان ته ولېږدول شي
/14.1.2009
داسې ښكاري چې په افغانستان كې د امريكايي پوځ د شمېر د زياتوالي په اړه د امريكا د متحده ايالاتو د نوي ولسمشر (( بارك اوباما )) هيله به ددغه پوځ د ودانيز تخنيك د سمبالتيا لارو ته په بنسټيز ډول بدلون وركړي . له پاكستان نه راغلې غرنۍ خطرناكې لارې نشي كولاى چې وار په وار هغه زياتېدونكي بارونه پرې راتېر شي چې نن ورځ يې امريكايي زغره وال موټرونه پوځي اډو ته رسوي .
د لويو درستيزانو د متحدې كومېټې رئيس د امريكا د سمندري پوځ جنرال (( مايك مولېن )) څرګنده كړې ، چې په افغانستان كې به امريكايي ځواكونه تر ۲۰ – ۳۰ زرو كسانو پورې زيات شي ، او لويه برخه به يې د ۲۰۰۹ ز كال په لومړيو شپږو مياشتو كې دغه هېواد ته ولېږدول شي . بايد يادونه وشي چې اوسمهال په افغانستان كې ۳۱ زره امريكايي سرتېري او افسران شتون لري . له دغه شمېر نه يې ۱۴ زره د ناټو د متحدو ځواكونو په تشكيل كې شامل او ۱۷ زره نور يې هم له اروپايي متحدينو نه په خپلواكه توګه فعاليت كوي .
د پوځيانو د شمېر له زياتولي سره سم به د پوځي – تخنيكي او نورې سمبالتيا د حجم د ژور زياتوالي ضرورت راپيدا شي . خو د قاغوشونو او د پوځي شبكې د ټولو اړخونو د بېړنۍ ودانونې مسئله يې تر ټولو ډېره جدي پاتې ده . د امريكايي پوځونو لوژستيك دا نيت لري چې خوراكي توكي او كارتوس د همګټو هېوادو د منځنۍ اسيا پوځي هوايي ډګرونو ته ورسوي ، خو د ودانيز تخنيك او ودانيزو توكو مسئله يې بيا ډېره ستونزمنه ده .
ددې لپاره يوازينۍ معقوله لاره شتون لري چې هغه د بالتيك بندرونو ته د تخنيك ، لرګو ، ګول سيخونو ، سمټو او نورو توكو رسول دي . له هغه ځايه اړينه ده چې دغه توكي د وسپنې په لارو د روسيې د خاورې له لارې تر هغو وروستيو تمځايونو او سټېشنونو پورې ورسيږي چې نومونه يې له هغه مهاله ټولې نړۍ ته ښه جوت دي ، كله چې ۳۰ كاله پخوا شوروي اتحاد خپل پوځونه افغانستان ته ننه ايستي ول . اوس تاريخ تكراريږي . همدا نن امريكايي باروړونكي موټرونه ، ايكسكواتورونه ، بېلدوزرونه ، او كرېنونه د هغو غاښو او كوتلونو له لارې لېږدول كيږي ، چې د شوروي پوځي كامازو موټرو چلوونكو ته ښه مالوم دي .
امريكايي سياستوال داسې څرګندوي چې له اختلافونو او د اړېكو له سوړوالي سره سره ، روسيې هېڅوخت ناټو او امريكا ته ددې مخنيوى نه دى كړى چې د ځمكني ترانسپورت په واسطه خپلو پوځونو ته ، چې په افغانستان كې ترهګريز ضد عمليات ترسره كوي ، د دې د خاورې له لارې ناپوځي بارونه ولېږدوي .
|
| فارسی.رو |
|
|
|
