|
|
| خبرونه/ |
روسيه به له افغانستان سره مرستو ته دوام وركړي
/7.3.2009
د روسيې د بېړنيو چارو وزارت د نړيوالې څانګې پازوال (( يوري براژنيكوف )) څرګنده كړې چې روسيه به د روان كال په بهير كې له افغانستان سره ۲۳ زره ټنه اوړه او د موټرو تخنيك مرسته وكړي .
نوموړي جګپوړي مامور وويل : (( د روان كال د جنوري له ۱۵ نېټې نه راهيسې دغه هېواد ته د ۱۸ زرو ټنو لومړۍ درجه اوړو د لېږدونې كار پيل شوى دى (( . دغه اوړه د رېل ګاډو په ۲۷۴ ډبو كې د وسپنې پر لاره لېږدول كيږي . ددې په څنګ كې د نوموړي په وينا (( تر اوسه پورې د اوړو د نوموړو ډبو له نيمايي نه زياته برخه افغانستان ته لېږدول شوې ده . د روسيې د بېړنيو چارو وزارت پلان لري چې ددغې بشري مرستې كار د يوې مياشتې په بهير كې په بشپړه توګه پاى ته ورسوي ((.
اړينه ده يادونه وشي چې افغانستان ته د ۱۸ زرو ټنو اوړو د لېږلو پرېكړه د روسيې د حكومت له لوري وروسته له هغه نه وشوه ، كله چې افغان ولسمشر حامد كرزي په دې اړه د روسيې د فدراسيون مشرتابه ته پاملرنه وكړه . د روسيې د بشري مرستې لومړنۍ دوې ډبې د فبرورۍ په اتمه د اوزبكستان پولې ته نږدې د افغانستان د حيرتان ښار ته رسول شوې دي . له روسيې نه افغانستان ته تر اوسه پورې د رېل ګاډو ټول ټال ۱۰۵ ډبې اوړه ، چې په بوريو كې ځاى پر ځاى وو ، لېږدول شوي دي .
د (( افغانستان. رو )) ويبپاڼې د خبرونو له مخې ، د سمنګان او يو شمېر نورو ولايتو اړو اوسېدونكو وكولاى شول چې له روسيې نه ورلېږل شوې بشري مرسته د مارچ مياشتې په لومړيو كې تر لاسه كړي .
)) براژنيكوف )) وويل چې دا له افغانستان سره د بشري مرستې يوازې لومړى پړاو دى ، په راتلونكې كې به له دغه هېواد سره مرسته د ملګرو ملتو سازمان د خوراكتوكو له نړيوال پروګرام سره په ګډه كيږي . (( براژنيكوف )) داسې خبر راكړ چې (( د روسيې د بېړنيو چارو وزارت پلان لري چې د ملګرو ملتو سازمان د خوراكتوكو له نړيوال پروګرام سره په ګډه افغانستان ته نور پېنځه زره ټنه اوړه هم ولېږي (( .
د روسيې د بېړنيو چارو وزارت چارواكو همدا راز څرګنده كړې ، چې روسيه پلان لري په ۲۰۰۹ زېږديز كال كې د افغانستان د ترانسپورت وزارت ته ۵۰ عرادې )) كاماز )) ډوله باروړنكي موټرونه ( لارۍ ) هم د مرستې په توګه وركړي . ددې په څنګ كې ښايي چې كابل ته د اورضد ( اطفايې ) موټرونه هم ولېږي .
|
| افغانستان.رو |
|
|
|
