|
|
| لومړی مخ/ |
د روسيې ولسمشر د ماسكو له جامع جومات نه كتنه وكړه
/16.7.2009
نن د روسيې په تاريخ كې يوه كمپېښه پېښه وشوه . ولسمشر مېدوېديف د ماسكو جامع جومات ته ولاړ . دى د روسيې لومړنى مشر دى چې دې كار ته يې زړه وكړ .
د روسيې مشر جومات ته له ننوتو نه مخكې بوټونه وايستل او له مسلمانانو سره يې په اسلام عليكم سره ستړې مه شي وكړه . د جومات په دننه كې د روسيې د ټولو مسلمانانو مشر مفتي دده انتظار كاوه . دميتري مېدوېديف له هر مفتي سره روغبړ وكړ ، د روسيې د مسلمانانو ځانگړى رول يې ياد كړ او له مذهبي افراطيت سره يې د مقابلې په اړه خبرې وكړې .
ولسمشر وويل ، چې د افراطيت ، له هغه شمېر نه پر مذهبي بنسټ ، د ودې په شرايطو كې ، اړينه ده چې صبر او حوصله په كارنده توگه پراختيا ومومي . دده له ليده ، په دې پروسه كې اسلامي روحانيون لوى رول لوبولاى شي ، او دولت كولاى شي چې د ديني زده كړو چارې پيل او په پښو ودوري . په دې لوري كې له لومړنيو گامونو نه يو هم ، په سوچي كې د اولمپيا د لوبو تر مهاله د جومات جوړول دي . ولسمشر په دې اړه داسې وويل : “ په دې شرايطو كې زموږ گډه او تر ټولو مهمه دنده د صبر او د ديني حوصلې پراخول ، زموږ د گڼ قوميز هېواد د ولسونو د معنوي ارزښتونو ، دودونو او د هغوى د كولتوري بېلابېل والي په وړاندې له غمخورۍ سره چلند كول دي “ .
د روسيې لوى مفتي شيخ راويل عين الدين ، جومات ته د ورتگ په خاطر له ولسمشر نه مننه وكړه . نوموړي وويل : “ موږ ډېره اوږده موده جومات ته زموږ د دولت د مشر د راتگ انتظار كاوه ، او دادى نن د لومړي ځل لپاره زموږ د دولت مشر د جومات د وره له درشل نه راتېريږي . دلته د ټولو راټولو شويو مفتيانو ، د مسلمانانو د روحاني ادارو د مشرانو او په ټوله كې زموږ د اسلامي ټولنې لپاره دا ډېره ستره او تاريخي پېښه ده “ .
د مېدوېديف له ليده ، اسلامي ديني سازمانونه او ټولنې د مدني سولې په پياوړتيا ، روحاني او اخلاقي روزنه ، له افراطيت او د بهرنيانو پر وړاندې له كركې سره مبارزه كې لويه ونډه لري . لكه څنگه چې مېدوېديف وويل ، د روسيې د مسلمانانو په وړاندې په ډېرو هېوادو كې درناوى احساسيږي .
هغه دا هم وويل چې د دولت د مشر ، د روسيې د فدراسيون د ولسمشر ، هر څوك چې وي ، دنده داده چې ټولو ديني لوريو ، په تېره بيا لويو دينونو ، له هغه شمېر نه اسلام دين ته هم پام ولري . مېدوېديف داسې زياته كړه : “ مسلمانان هېوادپال دي او هماغسې له روسيې نه دفاع كوي ، لكه د نورو دينونو پيروان چې يې كوي “ .
د روسيې د مفتيانو شورا د مشر راويل عين الدين ددې هيلې په ځواب كې ، چې تر ۲۰۱۴ ز كاله پورې دې په سوچي كې جومات جوړ شي ، ولسمشر داسې وويل : “ ښكاره خبره ده چې په دې اړه بايد فكر وشي ، دا ډېر سم كار دى “ .
د روسيې ولسمشر مسلمانانو ته داسې امېدواري وركړه : “ ښكاره خبره ده چې جوماتونه بايد جوړ شي ، دا ددې لپاره اړين دى ، چې زموږ مسلمانان وكولاى شي ، ځانونه هوسا احساس كړي او خپل عبادت وكړي . اړينه ده چې د نويو جوماتونو د ودانولو په اړه فكر وشي ، په تېره بيا په هغو ځايونو كې ، چې ډېر مسلمانان ژوند كوي او د گڼ شمېر مېلمنو ورتگ شونى وي “ .
ولسمشر ته د جومات د بيا رغونې او ودانيزو چارو بهير وښودل شو . همدا راز څرگنده شوه ، چې د سانت پيتربورگ په ښار كې د جوړېدونكي جامع جومات ودانيز كارونه به زر تر زره پاى ته ورسيږي .
د رسمي مالوماتو له مخې ، په روسيه كې څه دپاسه شل ميليونه مسلمانان ژوند كوي . كتونكو د نن ورځې له پېښې نه وروسته ، نه يوازې د هېواد د مسلمانانو ، بلكې په ټوله كې ، د ټولې اسلامي نړۍ په وړاندې د كرېملېن د ستراتېژۍ بدلون وليد . ښكاره خبره ده ، چې د روسيې په ټولنيز او سياسي ژوند كې ددغه هېواد د مسلمانو وگړو رول مخ په زياتېدو دى .
|
| فارسی.رو |
|
|
|
