|
|
| خبرونه/ |
په ماسكو كې به د بهر اوسېدونكو افغاني ټولنو نړيوال كانگرس جوړ شي
/27.7.2009
روسيې په پلازمېنه كې به د “ په افغانستان كې سوله او ټيكاو “ تر نامه لاندې د نړيوال كانگرس غونډه ترسره شي . لكه څنگه چې د افغانستان . رو مالوماتي پورتال ته خبر رارسېدلى ، په دغه غونډه كې به د گډون لپاره ، په بهر كې د ټولو افغاني ټولنو استازي ماسكو ته راشي .
“ په افغانستان كې سوله او ټيكاو “ تر نامه لاندې د نړيوال كانگرس د رابللو نوښت ، د اوسني افغانستان د څېړنو روسي مركز او له افغان اتباعو سره د مرستې مركز كړى دى .
ددغې جرگې د سمبالوونكو په خپره شوې اعلاميه كې ويل كيږي : “ په افغانستان كې د سوله او ټيكاو تر نامه لاندې د نړيوال كانگرس په كار كې د برخې اخيستو لپاره به د لومړي ځل لپاره د روسيې په پلازمېنه كې ، په روسيه كې ، همدا راز د پخواني شوروي اتحاد په هېوادو ، په اروپايي دولتونو ، امريكا متحده ايالاتو ، هند ، ايران او پاكستان كې د اوسېدونكو افغانانو استازي راټول شي “ . د كانگرس گډونوال به ، په افغانستان كې د سولې او ټيكاو د راتگ په تړاو مهمې مسئلې تر بحث لاندې ونيسي . د جرگې په كار كې به سياسي او ټولنيز شخصيتونه ، همدا راز د افغان كارپوهانو استازي گډون ولري .
د كانگرس سمبالوونكي داسې گڼي ، چې نن ، په افغانستان كې د ولسمشرۍ او پارلماني ټولټاكنو په درشل كې ، په نورو هېوادو كې د اوسېدونكو افغانانو د ټولنو سياسي اهميت پياوړى كيږي . د كانگرس د سمبالوونكې كومېټې په اعلاميه كې داسې ويل كيږي : “ اوسنى ۲۰۰۹ زېږديز كال ، د سياستوالو او كارپوهانو له خوا ، هم په خپله د افغانستان لپاره او هم د هغو هېوادو لپاره ، چې په افغاني پېښو كې ښكېل دي ، يو “ بدلون راوستونكى “ كال وو . دا ناڅاپي نه ده ، چې په ۲۰۰۹ ز كال كې په روسيه ، اروپايي هېوادو او د پارس خليج هېوادو كې ، په افغانستان كې د پېښو په اړه ځانگړي كنفرانسونه ، جرگې او “ گردي مېزونه “ راوبلل شول “ .
په ماسكو كې به د نړيوال كانگرس گډونوال پر داسې مهمو سياسي ، اقتصادي او بشري مسئلو خبرې وكړي ، چې له اوسني افغانستان سره تړاو لري . د جرگې گډونوال هيله لري ، چې د ښكاره خبرو اترو په بهير كې به نه يوازې په افغانستان كې د سولې او ټيكاو د راوستلو په لاره كې د لويو خنډونو يادونه وشي ، بلكې د افغاني اوږده شوي بحران ، چې په ټوله كې پر سيمه ييز امنيت منفي اغېز ښندي ، د لري كولو لپاره وريانټونه هم وړانديز شي .
|
| افغانستان.رو |
|
|
|
